بیجینګ (کوبهانیوز) – د افغانستان او چین ترمنځ د اقتصادي همکاریو د میکانیزم دریمه ناسته د چین د بهرنیو چارو وزارت د چارواکو او د طالبانو د حکومت د بهرنیو چارو وزارت د پلاوي په ګډون د چهارشنبې په ورځ په بیجینګ کې جوړه شوه.
په دې غونډه کې د طالبانو حکومت د صنایعو او سوداګرۍ، کانونو او پټرولیم، د کډوالو د راستنېدو، د طالبانو د حکومت د طبیعي پېښو پر وړاندې د چمتوالی وزارت استازو او د دوی د چینايي سیالانو ګډون کړی و.
د چين د بهرنيو چارو د وزارت په اعلاميه کې راغلي چې په دې غونډه کې چې د چين د بهرنيو چارو په وزارت کې جوړه شوې وه، مشری یي د چين د بهرنيو چارو وزارت د اسيا د څانګې مشر، لیو جنسانګ او د طالبانو د بهرنیو چارو وزارت د دریم سیاسی ریاست رییس، ذاکر کوله.
په دی ناسته کې د کابل او بیجینګ ترمنځ د عملي همکاریو او له افغانستان سره د چین د بشري مرستو په اړه خبرې شوی.
د چین د بهرنیو چارو وزارت په اعلامیې کې د لیو جنسانګ له قوله راغلي چې د چین د ولسمشر شي جین پینګ د سپارښتنې پر اساس، بیجینګ له طالبانو سره په خپلو اړیکو کې د صداقت، متقابلو ګټو او له ټولو افغانانو سره د دوستانه اړیکو اصول په پام کې نیسي.
ښاغلي ليو ويلی چې هېواد يې د افغانستان ملي حاکميت، ديني او وطني ارزښتونو ته درناوی لري او هيڅکله به د افغانستان په کورنيو چارو کې لاسوهنه ونه کړي.
که څه هم دغه چینايي چارواکي یو ځل بیا د امریکا له لوري د افغانستان د بهرنیو اسعاری زېرمو د خلاصون غوښتنه کړې او د طالبانو پر حکومت یې پر سیاسي فشار نیوکه کړې، خو د چین د بهرنیو چارو وزارت په اعلامیه کې د طالبانو له حکومته چې “د افغانستان سرپرست حکومت” په نوم یاد شوی، غوښتي چې د نړیوالې ټولنې غوښتنو، په ځانګړې توګه د یوه ټول شموله حکومت د جوړولو په اړه مثبت غوښتنو ته مثبت ځواب وایی.
د طالبانو د بهرنیو چارو وزارت د مرکچي پلاوي مشر ذاکر جلالي افغانستان ته د چین د سفیر د استولو او په بیجینګ کې د طالبانو د حکومت د سفیر د منلو له امله له چینه مننه کړی او له بیجینګ څخه یې غوښتي چې د اقتصادی پراختیا په برخه کې له خپلو تجربو څخه په استفادې د افغانستان په اقتصادي وده کې همکاري وکړي.
د چين د بهرنيو چارو وزارت د اسيا د څانګې مشر، لیو جنسانګ په دې غونډه کې ويلی، هېواد يې له افغانستان سره د اقتصادي اړيکو د پراختيا غوښتونکی دی او غواړي د “يو کمربند او يوې لارې” له پروژی سره د افغانستان په يو ځای کېدو سره د دغه هیواد د اقتصادي ودې لپاره زمينه برابره کړي.
د افغانستان د کانونو په برخه کې د بیجینګ د پانګونې د زیاتوالي ترڅنګ، چینايي چارواکي هڅه کوي چې دغه هېواد د “یو کمربند – یوي لار” په پروژه کې شامل کړي چې له څو کلونو راهیسې په پاکستان کې تر کار لاندې ده، خو په وروستیو میاشتو کې د امنیتی ستونزو له امله له خڼډ سره مخ شوی.
په دې وروستیو کې د طالبانو حکومت د افغانستان او چین ترمنځ د واخان ترانزیتي دهلېز د کار د چټکیدو خبر ورکړ، خو چینايي رسنیو لیکلي چې د امنیتي ګواښونو د زیاتوالي او په افغانستان کې د ترهګرو ډلو د فعالیتونو د پراخېدو له امله بیجینګ د دې پروژې له منفي پایلو اندېښمن دی.
اوس مهال د افغانستان او چین ترمنځ د سوداګرۍ اندازه په کال کې ۱.۳۳ میلیارده ډالرو ته رسېږي، چې د افغانستان برخه یوازې ۵۷ میلیونه صادرات او پاتې برخه یې له چین څخه واردات دي.