کابل کې د شخصي یونیفورم لرونکو کسانو له خوا د خلکو تلاشي کېدل

کابل ( ۲۸ حمل ۱۴۰۳)
د جمهوري نظام تر پرځېدو او د طالبانو تر بیا واکمنېدو وروسته اوس د افغانستان په ډیری ښارونو کې د طالبانو نظامیان له یونیفورم پرته د خلکو او موټرو په تلاشیو بوخت وي، چې خلک یې په تفکیک کې له ستونزو سره مخ شوې دي.
د کابل ښار یوه اوسیدونکي د نوم نه ښودلو په شرط کوبها نیوز ته وویل، چې د طالبانو سرتیري په ډيری چک پواینټونو کې له یونیفورم پرته له وسلو سره ولاړ وي ساده جامې یې پر تن وي او د خلکو تلاشي کوي.
نوموړي وویل، چې ددغسې کسانو په پېژندلو کې له ستونزو سره مخ دي.
« په ساده جامو کې خلک په چیک پواینټونو کې ولاړ وي او تلاشي کوي، موږ نه پوهیږو، چې دا دولتي کسان دي او که شخصي، خصوصا د شپې له خوا ددغسې کسانو په پېژندلو کې له ستونزو سره مخ یو.» د کابل ښار یوتن اوسیدونکی
په ورته مهال د کابل ښار یوه بل اوسیدونکي، چې قوای مرکز کې د موټرو د پرزو دوکان لري کوبها نیوز ته وویل، چې ډېر کله په لاره کې له داسې کسانو سره مخ کیږي، چې په شخصي جامو کې وسلې ورسره وي او موټر تلاشي کوي.
نوموړی وايي دوی د شپې نا وخته کور ته ځي او کله چې دغسې کسان ګوري خپله لاره ترې چپوي.
« زه د کابل قوای مرکز د موټرو د پرزو دوکان لرم، موږ سهار وختي کار ته ځو او ناوخته کور ته ستنیږو، موږ د تګ او راتګ پرمهال وخت ناوخت له داسې کسانو سره مخ کیږو، چې وسلې ورسره دي، ساده جامې یې پرځان وي او ځانونه دولتي کسان معرفي کوي، موږ نه پوهیږو، چې رښتیا هم دا دولتي کسان دي او که د دولتي کسانو په نوم غله دي.»
د کابل ښار دغه اوسیدونکي د طالبانو له حکومت څخه غوښتنه کوي، څو د هغو کسانو مخه ونیسي، چې د نظامیانو په نوم په شخصي جامو کې د خلکو په تلاشۍ بوخت وي.
دوی وايي چې دا کسان ملیشو ته ورته دي او که یې مخه ونه نیول شي ښايي ډيری کسان له شته وضعیت څخه په استفادې په ناوړه کارونو لاس پورې کړي.
خو تردې مخکې د طالبانو د کورنیوچارو وزارت ویلي، چې د دوی پولیس او سرتیري په منظم یونیفورم سمبال شوي او چاته اجازه نشته، چې په شخصي جامو کې خلک او د موټرو په تلاشیو لاس پورې کړي.