کابل( ۷ وری ۱۴۰۳ کوبهانیوز): د جمهوري نظام له سقوط وروسته په کابل کې پاتې شوي مخکیني جګپوړي چارواکي او سیاستوال د طالبانو حکومت د يوې “موظفې ادارې” له خوا تر جدي نظارت لاندې دي.
په کابل کې یوه پخواني سیاستوال ته نږدې سرچینې کوبها نیوز ته وویل چې د طالبانو د استخباراتو یو موظف یونټ د پخوانيو سیاسیونو او جګپوړو چارواکو د امنیت په نوم د هغوی د استوګنې پر ځایونو ګومارل شوی او د هغوی لیدنې کتنې، سفرونه او فعالیتونه له نږدې څاري.
د سرچینې په باور، دغه سیاسیون او مخکیني چارواکي په هیڅ ډول ولسي او سیاسي غونډونو کې برخه نهشي اخېستی او حتا خپلو ولایتونو ته د سفر اجازه نه ورکول کېږي.
د مخکیني ولسمشر محمداشرف غني د انتخاباتي ډلې يوه غړي کوبهانیوز ته وويل،”په کابل کې پاتې دا مشران حتا له عامو خلکو سره د لېدو لپاره یوه ورځ دمخه بايد د طالبانو موظفه یونټ په جریان کې کړي.”
د جمهوري حکومت له سقوط وروسته د پخواني ولسمشر حامد کرزي او د هغه د څو نږدې پلویانو په ګډون، د ملي مصالحې شورا مشر ډاکټر عبدالله عبدالله، د مشرانو جرګې رییس فضل هادي مسلمیار، د کډوالو پخوانی وزیر سید حسین عالمي بلخي، د ملي شورا یو شمېر وکیلان، د تېر حکومت ځینې والیان او د وسلهوال پوځ یو شمېر قوماندانان په کابل کې پاتې شوي دي.
د تېر حکومت تر سقوط وروسته د ۲۰۲۲ میلادي کال په مارچ میاشت کې د مشرانو جرګي پخواني رییس فضل هادي مسلمیار او د همدې کال په اپريل کې د مصالحې شورا پخواني رییس ډاکټر عبدالله عبدالله ته اجازه ورکړل شوه چې بهر ته سفرونه وکړي.
ويل کېږي له دې دواړو سیاستوالو د بېرته راستنېدو لپاره تضمين اخېستل شوی و، خو هغوی ته نږدې رسمي سرچینو تراوسه د داسې کوم تضمین د اخېستلو موضوع تایید یا رد کړې نهده.
په ورته وخت کې د سیاستوالو له سفرونو وروسته د همدې کال په جولای میاشت کې طالبانو پخواني ولسمشر حامد کرزي ته هم د بهرني سفر اجازه ورکړه. د لندن تر سفر وروسته د کرزي دفتر وویل چې پخواني ولسمسر ته درې نورو هېوادونو هم د سفر بلنه ورکړې وه، خو طالبانو هغه دې سفرونو ته نه دی پرېښی.
پر کور دننه سیاستوالو پر سفرونو بندیزونه او پرله پسې څار داسې مهال دی چې د طالبانو حکومت د بهرنیو چارو سرپرست امیرخان متقي په څو کورنیو او بهرنیو غونډو کې د خبرو پر مهال ويلي چې په هېواد کې د جمهوري حکومت پخواني چارواکي او سیاستوال له هیڅ ډول خطر او ستونزې پرته ژوند کوي.