اوتاوا (۱۹ کب ۱۴۰۲ کوبها نیوز): درې سوه افغانان له پاکستان څخه په یوه چارټر الوتنه کې د کاناډا کالګري ته رسېدلي چې په دغه هېواد کې خپل نوی ژوند پیل کړي.
د کاناډا د کډوالۍ، پناه غوښتونکو او تابعیت اداره وایي، دغه افغانان به د اډمنټون، ټورنټو او کیوبیک په ګډون د کاناډا په شاوخوا ۳۳ مختلفو سیمو کې ځای پرځای شي.
یاده اداره وايي چې د کابل له سقوط راهیسې یې تر ۴۹ زره زیات افغانان کاناډا ته انتقال کړي دي.
د کاناډا د کډوالۍ، پناه غوښتونکو او تابعیت اداره اداره له متحده ایالاتو او متحده عربي اماراتو سره کار کوي څو له افغانستان څخه بهر د هوایي سفرونو د اسانتیا لپاره انتخابونه وګوري او کاناډا ته له تګ وړاندې د افغانانو امنیتي پلټنې بشپړې کړي.
د ۲۰۲۱ کال په جولای میاشت کې پر افغانستان د طالبانو د ولکې له ټینګېدو سره هممهاله د کاناډا حکومت د اوتاوا د پخوانیو کارکوونکو او د کاناډا د وسله والو ځواکونو د همکارانو لکه پوځي ترجمانانو او د هغوی د کورنۍ د غړو لپاره د کډوالۍ او انتقال ځانګړي تدابیر اعلان کړل.
په زرګونو نور کسان په پاکستان، تاجکستان او متحده عربي اماراتو کې کاناډا ته د انتقال د بهیر بشپړېدو ته انتظار باسي، خو دقیق شمېر یې معلوم نه دی.
د کاناډا د کډوالۍ، پناه غوښتونکو او تابعیت اداره وايي، افغانان د یو زیانمن نفوس یوه برخه ده او د کاناډا حکومت نشي کولای چې د امنیت، محرمیت او امنیتي اندیښنو له امله په افغانستان کې د پاتې کسانو د شمېر په اړه جزئیات ورکړي.
د کاناډا حکومت په وار وار ویلي چې د دغو پروګرامونو پر وړاندې اصلي خنډ له اوتاوا نه افغانستان ته د الوتنو نشتوالی دی.