کابل( ۲۹ سلواغه ۱۴۰۲ کوبهانیوز) د کرکټ ملي لوبډله، دا ورځې د خپلو مینهوالو له پراخ غبرگونو سره مخ ده. په خواله رسنیو کې دا نېوکې د شريلنکا پر وړاندې له پرلپسې ماتو وروسته ډېرې شوې دي.
افغانستان همدا میاشت، له شريلنکا، لومړی په تسټ او بیا د یوه ورځینو لوبو په لوبلړۍ کې ماته وخوړه.
افغانستان د فبرورۍ پر ۱۴مه چې، د مینانو نړۍوالې ورځې سره برابره وه له شريلنکا په لوړ توپیر لوبه وبایلله. مدني فعال میرویس امرخېل د دغه ماتې په غبرګون پر خپل فسبوکپاڼه ولیکل چې”د زړه خوراک او میراثیانو ورځ مو مبارک شه. ”
د نوموړي دا طنز ښايي د فسبوک کاروونکو هغوو تبصرو ته اشاره وي، چې، ګواګې ملي لوبډلې ته ځینې لوبغاړي د روابطو پر بنسټ انتخابېږي.
د کرکټ بل مینهوال اکمل ظاهر ترکي بیا د کرکټ بورډ پر مشرتابه نېوکه کړې. هغه د طنز په ډول لیکلي: “دا د کرکټ بورډ مشرتابه او لوبغاړي، ترڅو چې خلک ورته کنځل ونه کړي نه ځي…څه ثابتول غواړي؟.”
په تبعید که افغان ژورنالیست سعید شینواری له دې امله چې د لوبډلې یو تن غړی وفادار مومند لوبې ته په پرلپسې ډول نه غوره کیږي، هغه ته په خطاب کې وايي: “دا ځل چې راستون شوې، کرارې ولاړ شه په کور کېنه.”
د کرکټ ملي لوبډلې پر وړاندې تر پرلپسې ماتو وروسته پر طنز سربېره نور پراخ غبرګونونه هم وو.
خبریال او د کرکټ څارونکي جعفر هاند په خپله فیسبوک پاڼه د شنبې ورځې پر لوبه “افغانستان بیا وبایلله” په عنوان تبصره کې وايي: ” لوبه مو په بیټینګ وبایلله. ټول لوبغاړي پکې یو ډول مسئول دي، خو ډېر مسئولیت پکې ګربز، ګلبدین او نجیب ته باید راجع شي. دوی دریو واړو داسې حالت کې ځانونه اوټ کړل، چې تر منډو پکې درېدو او لوبې غځېدو ته ډېره اړتیا وه. ” هاند لیکلي، هېڅ لوبغاړي د ابراهیم ځدراڼ په څېر مسئولیت ادا نه کړ او ژر اوټ شول، خو نېوکه لري چې ځدراڼ هم په وروستي اور کې بریا ته پاتې ۱۱ منډې پوره نهشوای کړای.
افغانستان له شريلنکا سره وروستۍ لوبه د څلور منډو په توپیر وبایلله. کپټان ابراهیم ځدراڼ یواځینی لوبغاړی و چې تر پنځوسو ډېرې منډې یې وکړې.
ژورنالیست او څارونکی اکرام الله اکرام وايي: ” زموږ کپتان صیب څه غوښتل!؟ همدا چې ناټ اوټ پاتې شي؟دا خو د بایللو لوبه نه وه.له اوپنینګ راووځه او تر اخره په ویکټ ولاړ پاتې شه خو په شپږو بالونو یوولس منډې درنه نه کیږي. دا خو بیخي بې خونده کرکټ دی.”
کرکټ بورډ تراوسه د دې نیوکو په غبرګون کې څه نه دي ویلي.