واشنګټن ( ۲۷ وری۱۴۰۳کوبهانیوز): د ملګرو ملتونو عمومي منشي انتونیو ګوتېرېش د امنیت شورا بېړنۍ غونډې کې خبرداری ورکړ چې، منځنی ختیځ د یوې ویجاوړنکې جګړې له خطر سره مخ دی.
د م م د امنیت شورا دا بيړنۍ غونډه پر اسراییل، د ایران تر غندویي برید وروسته، د اسرائیلو په غوښتنه بلل شوې ده.
ګوتېرېش په دې غونډه کې له ټولو خواوو وغوښتل چې، په منځي ختیځ کې د ترينګلي حالت د مخنیوي لپاره جدي اقدام او هلې ځلې وکړي.
انتونیو ګوترش وویل: ” دمنځني ختیځ خلک د یوې پراخې جګړې له اصلي خطر سره مخامخ دي، ایران او اسرايیل دې له تاوتریخوالي ډېرولو ډډه وکړي او له زغمه دې کار واخلي.
په ملګرو ملتونو کې د اسراییل سفیر ګلاد اردان د ایران سپاه پاسداران د یوه ترهګر سازمان په توګه یاد کړ او یادونه يې وکړه چې بايد د هغې پر وړاندې اقدام وشي.
اردان په خپلو خبرو کې ایران د حزب الله په ګډون په منځني ختیځ کې د وسله والو ډلو پر ملاتړ تورن کړ .
بل خوا په ملګرو ملتونو کې د ایران سفیر سعید اېروانی پر اسراییل د تهران وروستی برید د ځان دفاع په عنوان یاد کړ.
هغه وويل: “ایران په سیمه کې د کړکېچ په لټه کې نه دی او نه هم د کړکېچ د پراخولو هڅه کوي.”
د یکشنې په ورځ ایران پر اسراییل د لرې واټن د توغنديو او ځانمرګو ډرون الوتکو برید وکړ.
د ایران نیمه دولتي رسنۍ، تسنیم د دغه هېواد د پوځي چارواکو له خولې ویلي و، چې پر اسرائیلو د ایران د توغندیو او بې پیلوټه الوتکو لومړی هدف یوازې پوځي مرکزونه دي.
د اسرائیلو د پوځ ویاند تایید کړه، چې ایران له دوو سوو ډېر بې پیلوټه ځانمرګې الوتکې، کروز او بالستیک توغندي پر اسرايیل ورتوغولي دي. هغه ادعا وکړه چې د دغو توغندیو او بې پیلوټه الوتکو یوه لویه برخه اسرائیلو ته له رسیدو مخکې د اسرائیلو له فضا څخه بهر راغورځول شوي.