کابل (کوبها نیوز) – دا مهال د کابل ښار په ځينو سيمو کې په هره کوڅه کې امنيتي کمرې ليدل کېږي او وسله وال طالبان وايي، چې د دې کمرو نصبول يې د هېوادوالو د امنیت خوندیتابه د هڅو يوه برخه ده.
خو کابل ښاریان شکایت کوي چې، په اوسني ناوړه اقتصادي وضعیت کې د اوږد مهال لپاره د دغو کمرو اخیستل او ساتل د دوی له توان پورته دي.
د کابل زاړه ښار يوه اوسېدونکي چې په همدې سيمه کې د اچارو او حليم پلورنځي لري، کوبها نيوز ته وويل، چې د یوې کمرې په اخیستلو او ساتلو په میاشت کې درې زره افغانۍ لګښت راځي.
« زموږ د سیمې خلکو حوزی ته د جرمونو په اړه شکایت وکړ، دوه میاشتې وړاندې د حوزې قوماندان راغی او راته یې وویل چې د حویلۍ پر دوازه دوه امنیتي کمرې نصب کړم. ما ورته وویل چې لومړی زه د کمرې او سیسټم د اخستلو توان نه لرم، اوس بریښنا نشته او دا کمرې څنګه فعاله وساتو؟ لنډه دا چې دوی کمرې او د سولر سیسټم می واخیست، او اوس موږ د کمرو د تلویزیون او تجهیزاتو د ساتلو لپاره یوه کوټه جلا کړې.»
د کابل ښار د ده افغانانو سیمې اوسېدونکې شيرين کوبها نیوز ته وويل، چې د کیمرو په لګولو سره ډله ييزې غلاوې کمې شوې، خو د ده په وينا، جنايي ډلې ځان له وضعیت سره برابروی او اوس له کورونو لرې په داسې ځايونو کې غلاوې کوې چې کیمره نه وی.
” کېمرو تر یوه حده د غلو مخه نیولې ده، که څه هم تر اوسه مو نه دي اوریدلي چې د چا غلا شوې وي او بېرته ورته ورکړل شوې وي، خو ښه ده، له دې کمرو څخه د غلو سترګې سوځي او د چا لاره نه نیسي. لکه څنګه چې پخوا یې په رڼا ورځ غلا کوله.”
د کابل د قلعه زمان خان اوسېدونکی صابر وايي، چې د دوی د کور پر دروازې د امنیتي کمرې نصبول د ده او د کورنۍ لپاره ستونزي جوړی کړی
« دا کمرې زموږ لپاره د سر درد ګرځېدلی دی، څو ورځې وړاندې کله چې ماښام مهال کور ته را روان وم، دوه کسانو چې مخونه یې پټ کړي وو، پر لاره یی ودرولم او خبرداری یې راکړ، چې که طالبان موږ ته کومه ستونزه جوړه کړي، ته به یې مسوول یی، د حوزی پولیس هم هر دوه ورځې وروسته راځي او د کمرې عکسونه ګوري. ښايي غله به یوه ورځ زموږ لپاره ستونزه جوړه کړي، ځکه دوی فکر کوي چې موږ له حوزی سره همکاري کوو.»
یو کال وړاندې د طالبانو حکومت د کورنیو چارو وزارت د کورونو مخې ته د امنیتي کمرو د نصبولو پروګرام پیل کړ او له خلکو یې وغوښتل چې د سیمی د امنیتی حوزی د نقشې له مخې دی د خپلو کورونو مخې ته کمرې نصب کړي.
د طالبانو حکومت د کورنیو چارو زوارت ویاند، عبدالمتین قانع که څه هم په شخصي کورونو د نصب شویو کمرو دقیق شمیر نه په ګوته کوی، خو ادعا کوي چې د کورنیو چارو وزارت د کابل د دروازو په ګډون، په ټول ښار کې ۶۲ زره امنیتي کمرې نصب کړي دي.