کابل (کوبها نیوز) – د اسلامي نړۍ د علماوو د لیګ عمومي منشي او د اسلامي نړۍ د علماوو د سازمان مشر محمد العیسیٰ په یورو نیوز کې په یوه مفصله مقاله کې د طالبانو د حکومت پرېکړې ننګولې او د طالبانو ځینې کړنې یې له اسلامي اصولو سره په ټکر کې بللې دي.
د اسلامي نړۍ دغه عالم په خپله مقاله کې وایي، چې طالبانو له پیله له نړۍ سره تعامل ته تمایل نه درلود، خو په خپلو اسلام ضد پرېکړو سره په اسلامي هېوادونو او اسلامي نړۍ کې هم خپل باور له لاسه ورکوي.
نوموړي د سعودي عربستان په مکه مکرمه کې د تېرې اونۍ د دیني عالمانو غونډې ته هم اشاره وکړه، چې د افغان علماوو په ګډون د ټولې نړۍ دیني عالمانو پکې ګډون کړی و، خو طالبانو ته پکې د ګدون بلنه نه وه ورکړل شوې.
د اسلامي نړۍ د ټولنې عمومي منشي د طالبانو له خوا له شپږم ټولګي څخه پورته د ښوونځیو او پوهنتونونو د تړلو پریکړه جنسیتي تبعیض ګڼي او ټینګار کوي چې ښوونه او روزنه غربي ارزښت نه دی، بلکې د اسلام تعریف شوي اصول دي: «د طالبانو جنسیتي اپارتاید اوس هم اپارتاید ګڼل کیږي. هغه څه چې طالبان غربي ریښې ور کوي او فکر کوي غربي ارزښتونه دي، په حقیقت کې په اسلام کې ریښې لري او د اسلام د تاریخي ارزښتونو یوه برخه ده.”
د اسلامي نړۍ دغه عالم له کار څخه د ښځو منع کول د پیغمبر ص د سنتو خلاف ګڼي او ټینګار کوي چې په اسلام کې ښځې او نارینه مساوي فکري ظرفیت لري او په قرآن کریم کې هیڅ ځای هم د انسان عقلانیت د هغه د جنس پر بنسټ نه دی ټاکل شوی.
نوموړی د طالبانو نوم د هغوی له کړنو سره په ټکر کې ګڼي او وايي، چې د طالب کلمه عربي ریښه لري او د علم د غوښتونکي په معنا ده، خو طالبان برعکس د نورو د علم مانع شوي دي.
د اسلامي نړۍ دغه عالم په داسې حال کې د نجونو د زده کړو په اړه د طالبانو د حکومت پر کړنلارې او پرېکړو نیوکه کوي، چې له شپږم ټولګيو پورته ښوونځيو پر تړل کېدو څه باندې ۹۰۰ ورځې او د پوهنتونونو پر تړل کېدو شاوخوا شپږ میاشتې تېریږي.
که څه هم د طالبانو حکومت وايي چې ښوونځيو او پوهنتونونو ته د نجونو د تګ د منع کولو پرېکړه دايمي نه ده او د شرعي چوکاټ په برابرولو سره به يې ښوونځي او پوهنتونونه پرانستل شي، خو تر اوسه په دې برخه کې کوم پرمختګ نه دى شوى.