کابل (کوبها نیوز)- طالبانو د “نور” او “بریا” ټلویزیونونو پر خپرونو بندیز ولګاوه.
د طالبانو د رسنیزو سرغړونو د ارزونې کمېسیون وایي، چې د نور او بریا تلویزیونو دوسیې محکمې ته وړاندې کوي او تر هغه به ددواړو تلویزیونونو خپرونې بندې وي.
د اطلاعاتو او فرهنګ وزارت په مشرۍ د رسنیزو سرغړونو د ارزونې کمېسیون د سه شنبې ورځې په ناسته کې “بریا” او “نور “ټلویزیونونه په قومي او ژبني تعصب تورن کړل او وایي، خپرونې یې د ملي او اسلامي ارزښتونو خلاف دي.
په دغه کمیسیون کې د ازادو رسنیو استازو حفیظ الله بارکزي او د طلوع نیوز رییس ذبیح الله سادات له دې پرېکړې وروسته رسنیو ته وویل چې دغو دوو ټلویزیونونو دوسیې یې د ژورناليستيکي اصولو د نه مراعاتولو، ملي او اسلامي ارزښتونو په پام کې نه نیولو او قومي، ژبنيز او سمتي تعصب ته د لمن وهلو له امله محکمې ته راجع کړې دي او د محکمې تر پرېکړې به د دغو تلویزیونونو خپرونې بندې وي.
بریا د ګلبدین حکمتیار په مشرۍ د حزب اسلامي او نور د صلاح الدین رباني په مشرۍ د جمعیت اسلامي اړوند تلویزیونونه دي. دغه دوه ګوندونه خپلو کې پخوانۍ سیاسي تربګنۍ او مخالفتونه لري.
د افغانستان د خبریالانو د ملاتړ سازمان (AJSO) مشر حامد عبیدي کوبها نیوز ته وویل چې د طالبانو دغه تصمیم ډېری سیاسي اړخ لري، ځکه دې ادارې تېره اونۍ اعلان وکړ چې افغانستان کې سیاسي ګوندونه فعالیت نه شي کولای.
“زه فکر کوم طالبان لېوالتیا نه لري هغو رسنیو ته چې سیاسي یا هم حزبي رسنۍ وي او پخوا یې د مشخص حزب لپاره فعالیت کاوه، د هغوی فعالیت ته اجازه ور کړي. زه فکر کوم دا ډېر سیاسي تصمیم دی. طالبان د سیاسي ګوندونو ترڅنګ ددوی رسنیز فعالیتونه محدودوي او یا یې بندوي”.
طالبانو په دې وروستیو کې د ګلبدین حکمتیار په مشرۍ د حزب اسلامي ګوند دفتر، روغتون او ځینې فعالیتونه بند کړل او د عدلیې وزیر یې اعلان وکړ چې ټول سیاسي ګوندونه لغو شوي او هر ډول فعالیت یې جرم دی.
د رسنیزو چارو شنونکي په دې باور دي چې د ګوندي رسنیو په تړاو د طالبانو دغه نوې رسنیزه پالیسي ښایي دوی ته د ازادو رسنیو د فعالیتونو د محدودولو فرصت هم په لاس کې ور کړي.