واشنګټن (کوبها نیوز) د چهارشنبې په ورځ د امریکا د استازو جرګې د بهرنیو اړیکو کمېټې د افغانستان د سولې په چارو کې د امریکا د پخواني ځانګړي استازي زلمي خلیلزاد د ځوابونو نوي جزئیات خپاره کړل.
ښاغلي خلیلزاد د دې کمیټې غړو ته ویلی چې د امریکا او طالبانو ترمنځ د سولې لپاره د خبرو لومړۍ هڅه په ۲۰۱۰ کال کې هغه مهال وشوه چې د طالبانو اوسني دفاع وزیر، ملا یعقوب مجاهد ورته په یوه لیک کې لیکلي و چې جګړه د افغانستان د مسئلې د حل لار نه ده او دا چې د دې جګړې د پای ته رسولو لپاره باید سیاسی هڅې وشي، خو د اوباما د ادارې هڅې بریالۍ نه وې.
د افغانستان د سولې لپاره د امریکا پخواني استازي امریکايي وکیلانو ته د خپلو ځوابونو په یوه برخه کې وویل چې له طالبانو سره د سولې د عملي خبرو هڅې د ټرمپ په اداره کې پیل شوې او سپینې ماڼۍ ورته د دغو خبرو لپاره درې لومړیتوبونه ټاکلي: “لومړی، له طالبانو سره په خبرو کې داسې یوې هوکړې ته د رسېدو لپاره چې له افغانستانه د امریکايي ځواکونو په خوندي او منظمه توګه وتلو ته لاره هواره کړي، دویم، طالبان باید دا یقیني کړي چې افغانستان بیا د ترهګرو ډلو په پټنځای بدل نه شي او درېیم دا چې د واشنګټن او طالبانو ترمنځ خبرې اترې بین الافغاني مذاکراتو ته لاره هواروي.”
خو د امریکا د استازو جرګې د بهرنیو اړیکو د کمېټې ځینو غړو په تېره بیا جمهوري غوښتونکو په خپلو پوښتنو کې پر خلیلزاد نیوکې کړې دي. ځکه د دوی په وینا، خلیلزاد د خبرو اترو د پيل په لومړۍ هڅه کې پرته له دې چې پايلو ته یی پام وکړي، پر افغان حکومت فشار راوړ چې د حسن نیت په توګه زرګونه طالب بنديان خوشې کړي.
په ځواب کې خلیلزاد دوی ته ویلی چې له دغو فشارونو او بالاخره د بندیانو له خلاصون څخه یې هدف دا و چې طالبان بین الافغاني خبرو ته وهڅوي، خو د امریکا د کانګرس غړو ویلي چې د ښاغلي خلیلزاد دغه امتیازاتو د افغان حکومت په وړاندې د طالبانو دریځ نرم نکړ.
زلمی خلیلزاد د جوبایډن د حکومت پریکړو ته په اشارې سره ویلی چې د هغه اداره د طالبانو لپاره د نوي شرطونو د ټاکلو اراده نه درلوده او ان د طالبانو لپاره د ډونالډ ټرمپ له شرطونو څخه هم شاته شوې وه: “د ولسمشر بایډن ادارې درې انتخابونه وړاندې کړل: لومړی، دا چې هغه له طالبانو سره د سولې خبرې مشروطې نه کړې او تر ټولو خطرناکه دا ده چې له ترهګرۍ سره د مبارزې ماموریت ته یې شا کړه. دوهم، هغه د ټرمپ ادارې او طالبانو ترمنځ شوې هوکړه نیمګړې وبلله. درېیم، د ولسمشر بایډن ادارې له افغانستانه د امریکايي پوځیانو پر مشروط وتلو ټینګار نه درلود.“
خلیلزاد ویلي، د بایډن حکومت له لوری له طالبانو سره د ټرمپ ادارې د هوکړې د نه عملي کېدو او د هغوی لپاره د نویو شرطونو د نه ټاکلو لامل جګړې ته د طالبانو له بیا ور ګرځیدو ویره وه.