کراچۍ (کوبهانیوز) – د پاکستان له سند ایالت څخه د افغان کډوالو د ایستلو له پیل سره سم د دغه ایالت د دیني مدرسو د بورډ چارواکو رسنیو ته ویلي چې د پاکستان حکومت له دوی غوښتي چې افغان زده کوونکي دې په خپلو مدرسو کې نه شاملوي.
د سند ایالت په دیني مدرسو کې له هغه وروسته د نویو زده کوونکو پر ورتګ بندیز ولګېد چې د سند ایالت حکومت تېره اوونۍ د دغه ایالت د دیني مدرسو مشران یوې غونډې ته راوبلل او هغوی ته یې وویل چې څلور میاشتې وړاندې په کراچۍ ښار کې د پولیسو پر یوه مرکز په برید کې یوه ښوونکی لاس درلود او ادعا یې وکړه چې دغه ښوونکی افغان وو.
خو د پاکستان کورنيو چارو وزارت د دغو مدرسو د خاوندانو د پوښتنو په ځواب کې ويلي، چې ياد ښوونکی پاکستانی و او د بريد پر مهال وژل شوى دى.
په پاکستان کې د مدرسو د ټولنې مشر، مولانا طلحه رحماني عرب نیوز ته ویلي چې پاکستاني مدرسو یو کال وړاندې د افغان زده کوونکو نوم لیکنه بنده کړې وه.
رحماني وويل: “د پاکستان بېلابېلې استخباراتي ادارې وخت په وخت راځي او له مدرسو څخه معلومات ترلاسه کوي. مدرسی د نوم ليکنې ځانګړی سيستم لري او موږ له دغو ادارو سره همکاري کوو.”
په تیرو څلویښتو کلونو، په ځانګړې توګه په ۲۰۰۱ کال کې د طالبانو د رژیم له نسکوریدو سره زرګونو افغان ځوانان د دیني زده کړو لپاره د پاکستان په مدرسو کې شامل شول.
نړیوالو سازمانونو او د بشري حقونو بنسټونو په ځوانانو کې د افراطیت په وده کې د دغو مدرسو رول مهم بللی او د دغو مدرسو له خوا د افراطي افکارو ترویج یې په سیمه کې د افراطیت د خپریدو یو عامل ګڼلی دی.
په ۲۰۲۱ کال کې واک ته د طالبان له بېرته ستنیدو وروسته دوی له دغو مدرسو څخه د افغان محصلینو د بېرته ستنېدو پلان نه دی جوړ کړی، خو د طالبانو د پوهنې او لوړو زده کړو وزارتونو له یادو مدارسو څخه پر زرګونه فارغ شوو زده کونکو تحصیلي اسنادو په وېشلو سره، دغه زده کونکی د تخصص او رشتی خلاف په بېلابېلو دولتي ادارو کې د مسلکی کسانو پرځای ګمارلي دي.