بنجول (کوبها نیوز) – د اسلامي همکاریو د سازمان سرمنشي د ګامبیا په پلازمینه بنجول کې د اسلامي هیوادونو د مشرانو په پنځلسم کنفرانس کې په خپله وینا کې له طالبانو سره د بشري مرستو پر لارو چارو او رغنده خبرو ټینګار وکړ.
د اسلامي همکاریو د سازمان سرمنشي په دې سرمشریزه کې په خپله وینا کې له طالبانو سره د اړیکو په برخه کې د دغه سازمان پر ژمنتیا ټینګار وکړ. هغه له غړو هېوادونو وغوښتل چې د اسلامي پراختیايي بانک تر څارنې او مدیریت لاندې د افغانستان د بشري مرستو د وجهي صندوق (AHTF) له لارې له افغانستان سره مرسته وکړي.
حسین ابراهیم طه وویل: “دا ډېره مهمه ده چې په افغانستان کې د طالبانو له چارواکو سره د یوه بشري چلند او رغنده خبرو اترو په چوکاټ کې خپلې ښکیلتیا ته دوام ورکړو. موږ په غړو هیوادونو غږ کوو چې زموږ په بشري هڅو کې په سخاوتمندانه توګه مرسته وکړي، په ځانګړې توګه د AHTF له لارې.”
ابراهیم طه د اسلامی همکاریو سازمان له غړو هیوادونو وغوښتل چې د فلسطین د دولت په رسمیت پیژندلو او په ملګرو ملتو کښې د بشپړ غړیتوب د ترلاسه کولو لپاره د نړیوال ملاتړ ترلاسه کولو هڅو ته دوام ورکړی.
د اسلامي همکاریو سازمان سرمنشي د خبرو اترو او پخلاینې پر ارزښت په ټینګار سره د یمن، لیبیا، سوډان او عاج ساحل په شمول د غړو هیوادونو د شخړې د هواري لپاره د دغه سازمان ملاتړ مهم وباله.
د طالبانو د بهرنیو چارو وزارت په دې غونډه کې د بهرنیو چارو وزارت د ویاند او د دغه وزارت د نړیوالو سازمانونو د رییس عبدالقهار عاصي ګډون تایید کړی دی. د طالبانو د بهرنیو چارو وزارت وايي چې عاصي د اسلامي همکاریو سازمان په رسمي بلنه په دې غونډه کې ګډون کړی ، خو د غونډې په خپاره شوي انځور کې نوموړی نه ښکاري.
د اسلامي هېوادونو د مشرانو پنځلسم کنفرانس د “دوامداره پراختیا لپاره د خبرو اترو له لارې د یووالي او پیوستون پیاوړتیا” تر عنوان لاندې د ۲۰۲۴ کال د مې په څلورمه نېټه د اسلامي همکاریو سازمان د غړو هېوادونو او ناغړو دولتونو د استازو او مشرانو په حضور کې پیل شو.
د ګامبیا ولسمشر او د اسلامي همکاریو سازمان د غونډې رییس اداما بارو په دې سرمشریزه کې په خپله وینا کې په اسلامي نړۍ کې د یووالي، پیوستون او دوامدار پرمختګ د پراختیا ژمنه وکړه. هغه د اقتصادي همکاریو د ټینګښت، کلتوري تبادلې پیاوړتیا او د بیوزلۍ له منځ وړو، زده کړو او روغتیایي خدماتو ته د لاسرسي په څیر مهمو مسلو ته د رسیدو لپاره ګډې هڅې او نوښتونه مهم وګڼل.
دا سرمشریزه نن د ۲۰۲۴ کال د می پر پنځمه هم دوام لري او تمه کیږي چې خبرې اترې به د ګډو اهدافو د ترلاسه کولو لپاره د غړو هیوادونو ترمنځ په همکارۍ او ډیالوګ متمرکزې وي.