کابل (کوبها نیوز): د خبريالانو د خونديتوب نړيوالې کمېټې او د افغانستان د خبريالانو مرکز پر افغانستان انټرنشنال تلویزیون د طالبانو وروستي بندیزونه غندلي دي.
د طالبانو حکومت دغه شبکه له بې طرفۍ څخه په سرغړونې تورنه کړې ده. د طالبانو د رسنیزو سرغړونو د ارزونې کمېسیون وايي، افغانستان انټرنشنال تلویزیون د افغانانو محرمیت ته په نه درناوي، شخصیت وژنې، د معلوماتو تحریف او د طالبانو پر ضد د پروپاګند په ګډون په بېلابېلو سرغړونو تورن شوی. کمېسیون همداراز وايي، د دې شبکې پروګرامونه د ژورنالیزم له اصولو او ملي او دیني ارزښتونو سره په ټکر کې دي او قومي، ژبنيو او سمتي تعصبونو ته لمن وهي.
په نيويارک کې د خبريالانو د خونديتوب کميټې د اسيايي پروګرام همغږي کوونکي بيلي يه آزادو او بې پرې خبرونو ته د افغان خبريالانو او اتباعو د لاسرسي پر اهميت ټينګار کړی او پر طالبانو يې غږ کړی چې پر افغانستان انټرنشنال تلويزيون لګول شوي بنديزونه لغو کړي.
په ورته وخت کې د افغانستان د خبریالانو مرکز د طالبانو دا پرېکړه غیر قانوني بولي او له طالبانو یې غوښتي چې د ازادو رسنیو حقونو ته درناوی وکړي.
افغانستان انټرنشنال د طالبانو تورونه رد کړي او هغه یې بې اساسه ګڼلي. د دې شبکې مدیریت د افغانستان خلکو ته د بې پرې خبرونو او معلوماتو د وړاندې کولو په برخه کې پر خپلې ژمنتیا ټینګار کړی.
د افغانستان انټرنشنال اجرایوي رییس هارون نجفی زاده د دې شبکې له خوا د ژورنالیستیکي معیارونو او اصولو په رعایت ټینګار کوي او وايي: “هیڅ فشار به موږ دې ته اړ نه کړي چې خپل لوړ ژورنالیستیکي معیارونه او مسلکي اصول پریږدو. د طالبانو فشارونه د رسنیو لپاره ګواښ دی خو دوی زموږ د فعالیتونو مخه نه شي نیولی.”
د افغانستان انټرنشنال ټلویزیون پر خپرونو بندیز او له دې رسنۍ سره د همکارۍ ممنوعیت په داسې حال کې دی چې د طالبانو د رسنیزو سرغړونو د ارزونې کمیسیون له دې وړاندې دوه نور ټلویزیونونه هم محکمې ته معرفي کړي او خپرونې یې بندې کړې دي.