اسعداباد( ۱۲ جوزا ۱۴۰۳ کوبهانیوز): د کونړ د سرکاڼو ولسوالۍ په ناوې سیمه کې هغه دوه ښوونځي پرانېستل شول چې د پاکستاني پوځیانو د توغندويي بریدونو او له واک وړاندې د طالبانو د ناامنیو له امله تړل شوي وو.
ناوې د سرکاڼو ولسوالۍ اړوند د ډیورنډ فرضي کرښې ته څېرمه غرنۍ سیمه ده چې د پخواني حکومت پر مهال پرې د پاکستاني پوځیانو له خوا توغندويي بریدونه کېدل. پاکستاني لوري ظاهرا د دې بریدونو موخه د ټي ټي پي جنګیالیو په نښه کول ښودل، خو کابل نه یوازې په دې سیمو کې د ټي ټي پي جنګیالو شتون رد کړی، بلکې دا بریدونه یې پر افغان خاوره تېری بللی و.
په دې سیمه کې ۴۰۰ کورنۍ اوسېږي چې، ډېری یې د دغه بریدونو او د جمهوري حکومت پر مهال د افغان طالبانو د جګړو له امله کډه کولو ته اړې شوې وې.
د کونړ د پوهنې رییس محب الله حیدري وايي، بېځایه شوې کورنۍ بېرته خپلو سیمو ته ستنې شوې او ښوونځي یې پرانېستل شوي دي. حیدري تایید کړه چې، دا ښوونځي له تېرو اتو کلونو راهیسې تړلي پاتې وو.
محب الله حیدري وايي:” موږ هڅه کوو چې دغو زده کوونکو ته ټول امکانات برابر کړو.”
د ناوې سیمې د کمر ښوونځي زده کوونکې هوسۍ وايي، خوشاله ده ښوونځي ته ځي. د هوسۍ په وینا: ” دلته به راکټونه راتلل، موږ لاندې درې ته کډه شوي وو، هلته مکتبونه خلاص وو، خو موږ مکتب ته نه تللو. تېر کال چې بېرته خپل کلي ته راغلو بیا هم زموږ ښوونځی تړلی و، خو دا چې اوس خلاص شول ډېره خوشاله یمه.”
د یاد ښوونځي بل زده کوونکی یاسر وايي، هیله لري چې د پوهنې وزارت د دوی ښوونځي ته امکانات برابر کړي. هغه زیاتوي: “زموږ ښوونځي کې د څښاک اوبه نه شته، درسي کتابونه نه دي راکړل شوي، مکتب مو انګړ نه لري.”
د کونړ د پوهنې ریاست مني چې د دغه ولایت په ځینو سیمو کې یو شمېر ښوونځي بشپړ امکانات نه لري او هڅه کوي چې رسیدهګي ورته وکړي.
رپوټ: عبدالاحد ځیرک