جینیوا (کوبهانیوز) – د افغانستان د بشري حقونو په چارو د ملګرو ملتونو ځانګړي راپور ورکونکی په افغانستان کې د بشري حقونو، په ځانګړې توګه د ښځو د حقونو د وضعیت په اړه خپلې موندنې د «سیستماتيک تبعیض، د بشري کرامت او د ښځو د محرومیت» تر سرلیک لاندې د بشري حقونو د شورا غونډې ته وړاندې کړې.
ریچارډ بنیټ د دغه راپور د وړاندې کولو پر مهال وویل: «د طالبانو له خوا پر ښځو او نجونو سیستماتیک ظلم د هغوی ژوند ته سخت زیان اړولی دی او باید د بشریت وجدان په دې اړه بیداره شي. د ښځو د محرمیت د تر پښو لاندې کولو ظلم او تېری دومره سخت دی چې د بشریت ضد جنایت نښې په کې لیدل کیږي او دا ظالمانه اقدامات په شدت سره مخ په زیاتیدو دي.”
په داسې حال کې چې د طالبانو حکومت له یو کال راهیسی ښاغلی بنیت ته افغانستان ته د سفر اجازه نه ورکوی ترڅو د افغانانو د بشري حقونو وضعیت له نږدې وڅیړي، خو د ملګرو ملتونو دغه ځانګړي استازي د دغه سازمان د بشري حقونو په شورا کې د وینا پر مهال له طالبانو وغوښتل چې د ښځو په وړاندی دی سیستماتیک تبعیض ودروی او د ښځو ځورول دی بند کړی.
ښاغلي بنیټ له نړیوالې ټولنې په ځانګړې توګه له هغو هېوادونو چې پر طالبانو نفوذ لری او د ملګرو ملتونو له امنیت شورا وغوښتل چې د افغانانو په ځانګړې توګه د ښځو او نجونو پر وړاندې د طالبانو د ځپونکو اقداماتو د مخنیوي لپاره له ټولو امکاناتو کار واخلي.
په داسې حال کې چې د ملګرو ملتونو حقوق پوهان د «جنسيتی اپارتاید» د تعریف او د دې اصل د پیژندنې په برخه کې سره ویشل شوي، د ملګرو ملتونو دغه چارواکي له غړو هیوادونو غوښتي چې د ښځو پر وړاندې جنسیتي تبعیض دی په رسمیت وپیژني.
د بشري حقونو د شورا د سه شنبې ورځې په غونډه کې، د ملګرو ملتونو راپور ورکوونکي او د افغان ښځو په استازیتوب ګډون کوونکو ښځو د دوحې په راتلونکې غونډه کې د ښځو او مدني ټولنې د استازو د ګډون غوښتنه وکړه.