د کونړ او چترال ترمنځ د جیش محمد او جنود حفصه جنګیالي ځای پرځای شوي

په پاکستان کې د ټي ټي پي د بریدونو له ډېرېدو سره هممهاله چې ددغه هېواد د پوځ او حکومت له غبرګونونونو سره مل دي، ددې ډلې یو شمېر پخوانۍ ملاتړې او جلاشوې ډلې د ډیورنډ کرښې په اوږدو کې د نفوذ کولو په لټه کې دي.

چترال ددې ډلو د تمرکز نوې نقطه ده چې غیر پښتون نفوس دوی ته په دې سیمه کې د نفوذ امکانات ور کوي او بدخشان، نورستان او کونړ ولایتونو ته لارې لري.

د ۲۰۲۳ کال په سپټمبر کې ډېورنډ کرښې ته څېرمه کیلاش او چترال سیمو کې د مولوي عظمت الله مسید په مشرۍ پاکستاني طالبانو د پاکستان پر امنیتي پوستو بریدونه وکړل او څلور تنه پاکستاني پوځیان یې ووژل او دوه امنیتي پوستې یې وسوځولې.

دې بریدونو د چترال په خلکو کې ددې سیمې د امنیت او راتلونکي په تړاو اندېښنې پیدا کړې.
په چترال کې د ګلبدین حکمتیار په مشرۍ د حزب اسلامي پخواني ټرېننګ کمپونه او سمڅې دي، چې د مجاهدینو او شوروي اتحاد د جګړو په وخت کې ترې د کونړ او نورستان لپاره اکمالات کېدل او جنګیالي پکې روزل کېدل، خو اوس دغه مرکزونه او سمڅې د نامعلومو جنګیالیو په ولکه کې دي.

په چترال کې د اسماعیلیه ټولنې یوه جګپوړي غړي کوبها نیوز ته له نومښودنې پرته وویل، چې په دې تونلونو کې په دې وروستیو کې محلي تاجرانو د جلغوزیو حاصلات ذخیره کول، خو د پاکستان پوځ د ۲۰۲۳ کال په نیمايي کې دغه پخواني ټریننګ مرکزونه خالي کړل. هغه وايي: « پخوا په دې غرنیو سیمو کې سیمه ییزو خلکو رمې پوولې او د جلغوزو لپاره به تلل، خو تېرکال د ټي ټي پي له بریدونو وروسته پوځ د سیمې خلک په غرنیو سیمو کې له ګرځېدو او د رمو له څرولو منع کړي».

د چترال یو محلي خبریال وايي، چې په دې سیمه کې د طالبانو په نامه د جنود حفصه، جیش محمد او لشکر طیبه جنګیالي ځای پرځای شوي او ښايي د پاکستاني طالبانو د تېر کال مرګوني برید یو هدف ددې ډلو پر وړاندې غبرګون وي.

په چترال او کیلاش کې د جنګیالیو ډلو له حضور وړاندې د پاکستان امنیتي ادارو د ۲۰۲۲ کال په اکتوبر کې د یوه متقاعد پخواني چارواکي عبیدالله بیګ د خلاصون په بدل کې د جنود حفصه ډلې د ګیلګت بلتستان پخوانی مرستیال حبیب رحمان او د هغه ملګري له زندان نه خوشي کړل او هغوی بېرته په دیامر، چترال او کیلاش کې فعالیتونه پیل کړل.

جنود حفصه د مولوي عصمت الله معاویه ډله ده، چې په ټي ټي پي کې د پنجابي طالبانو په نامه مشهوره وه او په پنجاب او ګلګت بلتستان کې یې فعالیتونه کول. معاویه د ضرب عضب عملیاتو په ترڅ کې د پاکستان پوځ ته تسلیم او په پېښور کې میشت شو. د نوموړي په اړه ویل کیږي چې اوس دداعش ډلې لپاره جلب او جذب کوي.

چترال د هندوکش له لوړو څوکو جوړ شوی او د افغانستان له نورستان، کونړ او بدخشان ولایتونو سره ګډه پوله لري. د بدخشان پامیر نرۍ څوکه دغه سیمې له چین او تاجکستان څخه بېلوي.