واشنګټن (۲۲کب ۱۴۰۲، کوبها نیوز) د ” استخباراتي ټولنې” په نوم د امریکا ۲۵ کشفي او استخباراتي نهادونو د امریکا پروړاندې د موجودو ګواښوونو په ارزونې سره موندلې، چې د داعش خراسان څانګه به روان میلادي کال په افغانستان کې ډېرې حملې ترسره کړي.
په دې ارزونه کې، چې د امریکا د امنیت او ملي ګټو پروړاندې احتمالي ګواښوونه په ګوته شوي، له القاعده څخه د یوې کمزورې شوې ډلې په توګه یادونه شوې خو برعکس یې د داعش ګواښ تر ټولو جدي ګڼلی دی.
په دې ارزونه کې راغلي، چې د داعش خراسان څانګه په دې لټه کې ده، چې د طالبانو حکومت د کمزوري ښودلو په نیت په افغانستان کې د بهرنیو هیوادونو پر اهدافو بریدونه زیات کړي، خو په دې راپور کې د داسې کوم مشخص هیواد نوم نه دی اخستل شوی، چې د داعش له ګواښ سره مخ وي.
په راپور کې راغلي، چې طالبانو د خپلو ځپوونکو اقداماتو په ترسره کولو سره پر افغانستان خپل کنترول زیات کړی او روان کال به د دوی ټوله هڅه دا وي، څو له نړۍ سره تعامل وکړي.
د امریکا د استخباراتي ادارو ارزونې ښيي، چې د طالبانو د حکومت پروړاندې د کورنیو مخالفو وسله والو ډلو د تهدید کچه ډېرې ټيټه ده، ځکه د افغانستان خلک له جګړو ستړي شوي او له بل لوري مخالفې وسله والې ډلې نه دومره پیاوړي دي او نه هم بهرنی ملاتړ له ځانه سره لري.
د امریکا د دغو ۲۵ استخباراتي نهادونو مسوولینو د دوشنبه په ورځ د امریکا د سنا مجلس استعماعیه غونډې ته د خپلو ارزونو د جزیاتو وړاندې کولو پرمهال وویل، چې سیمه ییز قدرتونه به هڅه وکړي، څو په افغانستان کې موجودې ستونزې د همدې هیواد تر جغرافیې محدودې پاتې شي او نورو هیوادونو ته پراخې نه شي، خو ورسره هممهال د طالبانو حکومت د په رسمیت پېژندلو له وړاندیز سره هم په ډېر احتیاط پرمخ ځي.