کابل(کوبها نیوز)— د اسلامي همکاریو سازمان یو پلاوی له تېرو دوو ورځو راهیسې په کابل کې دی، چې د طالبانو له حکومت سره د ښځو د حقونو، بشري حقونو او د نجونو د زده کړو په تړاو له نږدې وغږیږي.
په دغه پلاوي کې چې اکثریت یې ښځې دي، په بشري، فرهنګي او ټولنیزو چارو کې د اسلامي همکاریو سازمان مرستیال او د افغانستان لپاره د یاد سازمان د سرمنشي ځانګړی استازی ډاکټر طارق علي بخیت، د اسلامي همکاریو سازمان د بشري حقونو خپلواک کمېسیون اجرائیوي رئیسه ډاکټره نوره الرشود، د فرهنګي، ټولنیزو او کورنیو چارو عمومي رئیسه امینه الحجیري او د ښځو د پراختیا سازمان اجرائیوي رئیسه افنان الشعیبي شامل دي.

دغه پلاوي په تېرو دوو ورځو کې د طالبانو د حکومت د بهرنیو چارو، د امر بالمعروف او نهی عن المنکر، د ټولنیزو چارو وزیرانو او د ریاست الوزرا له مرستیال او یو شمېر نورو چارواکو سره کتلي او د دې کتنو یو مهم اړخ د ښځو حقونه او د نجونو زده کړې دي.
د طالبانو د بهرنیو چارو وزارت یوې سرچینې کوبها نیوز ته له نومښودنې پرته وویل چې “د اسلامي همکاریو سازمان پلاوي ډېر تمرکز د ښځو پر حقونو او د نجونو پر زده کړو دی چې د اسلامي شریعت په رڼا کې بېرته اعاده شي او په دې توګه افغانستان له اسلامي نړۍ او نورې نړۍ سره وصل شي.”
د طالبانو چارواکو په دې ناستو کې د اسلامي همکاریو له سازمان نه غوښتي چې په دغه سازمان کې د افغانستان څوکۍ ور وسپاري او په ګامبیا هېواد کې ددغه سازمان راتلونکې ۱۵ مې غونډې ته ددوی استازی هم ور وبولي.
دمګړۍ د اسلامي همکاریو سازمان د کابل لپاره یو ځانګړی استازی ټاکلی او په افغانستان کې یې د خپلو انکشافي پروژو د پلیتابه لپاره د طالبانو له حکومت سره د مستقیم تعامل پرځای غوره ګڼلې چې د ترکیې د تیکای او د اذربایجان د انکشافي مؤسسو له لارې را وړاندې شي.
ټاکل شوې د اسلامي همکاریو سازمان پلاوی د طالبانو له نورو مشرانو او احتمالا ددې ډلې له روحاني مشر ملاهبت الله اخوندزاده سره هم وګوري، خو نوموړي له دې وړاندې په مکرر ډول د اسلامي نړۍ د علماوو له پلاویو سره له لیدنې انکار کړی.