اسلام اباد (کوبها نیوز)- پاکستان په خوښۍ سره اعلان وکړ چې درې میلیارده ډالره یوازې په تیره یوه میلادي میاشت کې له بهرنیو هیوادونو پاکستانیانو خپلو کورنیو ته استولي دي.
د پاکستان مرکزي بانک وايي چې دا ددغه هیواد په تاریخ کې یو نوی ریکارډ دی. د پاکستان دولتي بانک ویلي چې په وروستیو کې هره میاشت څه باندې ۳۰ په سلو کې د استول شویو پیسو په کچه کې زیاتوالی راغلی چې په کلني ډول دغه کچه څه باندې ۱۶ په سلو کې زیاته شوې.
د پاکستان دولتي بانک په خپل وروستي رپوټ کې ویلي چې په وروستیو ۹ میاشتو کې پاکستان ته ۲۱ میلیارد ډالره پاکستاني کارګرو له بهره وراستولي چې د پاکستان په اوسني کړکیچن اقتصادي وضیعیت کې خورا ډیرې پیسې دي او داسې هیلې ورسره زیږیدلې چې د پا کستان اقتصادي بیړۍ به له ډوبیدو وژغوري.
په تیرمارچ کې پاکستان ته په استول شویو درې میلیارد ډالرو کې لویه برخه یې له سعودي څخه پاکستاني کارګرو کورونو ته استولي چې څه باندې ۷۰۰ میلیون ډالرو ته رسیږي. ورپسې نژدې پنځه نیم سوه میلیون ډالره له عرب اماراتو، څه باندې ۴۶۱ میلیون ډالره له بریتانیې او څه باندې ۳۷۲ میلیون ډالره له امریکا پاکستان ته پاکستاني کارګرو استولي دي.
دا په داسې حال کې ده چې د پاکستان لومړي وزیر له سعودي څخه په لیدنه کې د نور پور او پاکستاني کارګرو ته د نورو ویزو غوښتنه وکړه. د شمیرو ترمخه څه باندې دوه میلیونه پاکستانیان په سعودي کې په کار بوخت دي.
پاکستان کې دا مهال د بې وزلۍ کچه ۴۰ په سلو ته لوړه شوې او په وروستیو پنځو کلونو کې پاکستانۍ کرنسۍ ۹۶ په سلو کې ارزښت له لاسه ورکړی چې ورسره ددغه هیواد اقتصاد د پاشل کیدو درشل ته رسیدلی او دغه هیواد یې د پورونو د بیرته ورکړې له وړتیا ویستلی دی.
د رپوټونو له مخې، د انفلاسیون کچه نژدې ۳۰ په سلو کې لوړه شوې چې له بهره د ور استول کیدونکو پیسو او مصرفوونکو کورنیو لپاره ښه خبر دی. پر اسلام اباد د بهرنیو پورونو کچه ۸۷ میلیارد ډالرو ته رسیدلې چې باید په راتلونکو دوو میاشتو کې اته میلیارد ډالره پور بیرته ادا کړي.
د اقتصادي چارو شنونکي وایي، په پورونو او انفلاسیون کې ډوب پاکستان اوس د خپل نژدې اتیا کلن عمر په خورا بد وضیعت کې دی چې هیڅ هیواد یې له ډوبیدو نشي ژوغورلی.