مزارشریف (کوبها نیوز، ۶ وری ۱۴۰۲): د طالبانو اطلاعات او فرهنګ وزارت روان کال په بلخ ولایت کې د مولانا جلالالدین محمد بلخي خانقا د رغولو چارې پیلوي.
د مولانا جلالالدین محمد بلخي د خانقا رغولو چارې که څه هم شاوخوا یوه لسیزه وړاندې د ترکیې هېواد له لوري پیل شوې وې خو د ځینو ستونزو له امله یې چارې وځنډیدې.
اوس د بلخ ولایت د اطلاعات فرهنګ رییس ذبیحالله نوراني وایي، سره له دې چې یې ترکیې هېواد ته د دغې تاریخي ابدې د بیارغولو وړاندیز کړی خو د هغوی له لوري یې غوښتنه رد شوې ده.
هغه زیاتوي، چې د دوی د سرپرست حکومت د اطلاعات او فرهنګ وزارت غواړي روان کال د دغې ابدې د بیارغولو چارې پیل او په دې برخه کې پانګونه وکړي.
د نوموړي په وینا د دغې ابدې د رغولو ترڅنګ په دغه سیمه کې ۳۰ جرېبه ځمکه باندې د سیل لپاره ځای هم جوړېږي.
نوراني دغه راز زیاته کړه، چې د تاریخو ابدو د ساتنې او د خپلسرو کېندنو په موخه صفر ۱۲ قطعه ګمارل شوې او تر دا مهاله یو شمېر کسان هم د خپلسرو کېندنو په تور نیول شوي محکمې ته معرفي شوي دي.
بل خوا د بلخ ولایت یو شمېر اوسیدونکي د طالبانو له حکومته غوښتنه کوي چې د نورو تاریخي ابدو د ساتنې ترڅنګ د هغوی رغولو ته لاس په کار شي.
د بلخ ولایت بلخ ولسوالۍ اوسیدونکی سیدرسول وايي، یاده ولسوالۍ کې بې شمېره تاریخي ابدې شتون لري او زیاتوي چې حکوما یې باید رغولو لپاره لاس په کار شي.
د یادې ولسوالۍ بل اوسیدونکی عیسيخان هم ورته غوښتنه کوي او وایي چې د تاریخي او فرهنګي ابدو له جوړیدو سره به د سیلانیانو ورتګ دې پام وړ زیاتوالي راشي او تر څنګ حکومت ته به د عواید ښه سرچینه جوړه شي.
په همدې حال بلخ کې د تاریخي ابدو د ساتنې قطعې ۰۱۲ پنځم ټولي قومندان اخترمحمد عثماني وایي، چې دغې قطعې په بلخ ولایت کې یو شمېر کسان د خپلسرو کېندنو په تور نیولي او سزا یې ورکړې ده.
هغه خبرداری ورکوي، چې خلک دې له خپلسرو کېندنو لاس واخلي او کنه قانوني چلند به ورسره کوي.
دا په داسې حال کې ده، تر دې وړاندې د بلخ ولایت اوسیدونکو له حکومته د مولانا جلالالدین محمد بلخي د خانقل سربېره د ځینو نورو تاریخي ابدو د جوړولو غوښتنه کړې وه.
راپور: سهراب ستانکزی