نوی ډیلی (کوبها نیوز) له یوې اونۍ راهیسې د طالبانو حکومت یو ځل بیا په نوي ډیلي کې د افغانستان د سفارت او په ممبۍ کې د کونسلګرۍ د کنټرول لپاره هڅې پیل کړي دي.
د هند په بهرنیو چارو وزارت کې سرچینو د هندو (The Hindu) ورځپاڼې ته ویلي چې د طالبانو د حکومت بهرنیو چارو وزارت یو افغان محصل چې د جنوبي اسیا (South Asian University) په پوهنتون کې د دوکتورا په زده کړو بوخت دي، د هند بهرنیو چارو وزارت ته په ممبۍ ښار کې د افغانستان د قونسلګرۍ د سرپرست په توګه وړاندیز کړی دی.
په ملګرو ملتونو کې د افغانستان د دایمي استازولی سرپرست، نصیر احمد فایق، ده هندو ورځپاڼې ته ویلی: “تر هغو چې د افغانانو غوښتنې نه وي منل شوي، له طالبانو سره د هېوادونو اړیکې باید عادي نه شي او حکومت یې په رسمیت ونه پېژندل شي. نړیواله ټولنه باید په افغانستان کې د یو ټول شموله نظام په جوړولو تمرکز وکړي چې د خلکو په اراده، عدالت او د قانون پر بنسټ رامنځته شوي وي.”
په ممبۍ کې د افغانستان د قونسلګرۍ فعالیتونه تېره اوونۍ وروسته له هغه له ستونزو سره مخ شول چې په هند کې د افغانستان د سفارت شارژدافیره او د ممبۍ د قونسلګرۍ سرپرسته، ذکیه وردګ د هند د سرحدي پولیسو له خوا په ناقانونه توګه د ۲۵ کیلو ګرامو سرو زرو په قاچاق تورنه شوه او له خپلې دندې استعفا وکړه.
د تېر کال په مې میاشت کې کله چې په نوي ډیلي کې د افغانستان د سفارت سرپرست فرید ماموندزي د سفارت د کارکوونکو تر منځ د اختلافاتو له امله له خپلې دندې استعفا وکړه، هغه مهال هم طالبانو هڅه وکړه چې هند قانع کړي چې د دوی استازی ومني خو د هند بهرنیو چارو وزارت یې غوښتنه رد کړه.
اوس مهال په ممبۍ کې د افغانستان قونسلګرۍ په هند کې ۲۵۰۰۰ افغانانو ته قونسلۍ خدمتونه وړاندې کوي، خو په ممبۍ او حیدراباد کې د افغانستان سفارت او قونسلګریو راتلونکی برخلیک معلوم نه دی.
په جینیوا کې د افغانستان سفارت يوه کارکوونکي کوبها نيوز ته وويل چې د افغانستان د اسلامي جمهوريت د ډيپلوماتانو د همغږۍ شورا په درېيمه کلنۍ غونډه کې چې د مې په اوومه د پولنډ په پلازمېنه وارسا کې جوړه شوې وه، د پخوانی حکومت سفيرانو پرېکړه وکړه په د هند حکومت ته د یوه لیک په استولو سره به تری وغواړی چې په هند کې د سفارت دې طالبانو ته تسلیم نه کړي.
دغه سرچینه وايي، په دی ناسته کې پریکړه وشوه چې که هند موافقه وکړي، دوی به په ملګرو ملتونو کې د افغانستان د دایمي استازولي یو ډیپلومات په هند کې د افغانستان د سفارت او په ممبۍ او حیدراباد کې د افغانستان د قونسلګریو د سرپرست په توګه ور معرفي کړي.
د ۲۰۲۲ کال په جون کې په کابل کې د هند د سفارت له پرانستلو وروسته، هند یو شارژدافیر د دغه سفارت د سرپرست په توګه وټاکه او په دې توګه نوی ډیلی د طالبانو له حکومت سره په منظم ډول تماس کې دی.
د افغانستان، پاکستان او ایران لپاره د هند د بهرنیو چارو د وزارت سکرتر، جې پي سینګ هم د روان کال په مارچ میاشت کې کابل ته د خپل سفر په ترڅ کې د طالبانو د حکومت له چارواکو سره وکتل.