کابل( د وري لومړۍ ۱۴۰۳): د نوي ۱۴۰۳ ل کال له پېلېدو سره سم، نن د هېواد په ټولو سړو سیمو کې ښوونیز کال هم پيل شو چې، ويل کېږي يو اعشاريه دوه ميليونه نوي زدهکوونکي به ښوونځیو ته داخل کړای شي.
د طالبانو د پوهنې وزارت سرپرست د ښوونیز کال د پيلېدو په تړاو جوړه شوې غونډه کې د دیني او عصري علومو پر کیفیت ټينګار وکړ او دا علوم يې اړين وبلل.
مولوي حبیب الله آغا په دې مراسمو کې چې د کابل په اماني لیسه کې نېول شوي وو، له شپږم پورته نجونو ټولګیو د بیرته پرانستلو او زدهکړو د بیا پیل په اړه هیڅ و نه ويل.
خو په هېواد کې د نوي تعلیمي کال له پېلېدو سره جوخت ټولې هغه نجونې چې همدا سږکال اووم ټولګيو ته بریالي شوې له زدهکړو بېبرخې شوې.
تراوسه رسمي ارقام نه دي وړاندې شوي، چې سږکال به اووم ټولګیو ته بریالۍ شوې څومره نورې نجونې له زدهکړو بېبرخې کېږي، خو غېر رسمي شمېرې، دا ارقام تر درې سوه زره ډېر ښي.
هيله او مریم دوه همزولې خویندې دي، چې تر ژمنۍ رخصتۍ دمخه اووم ټولګي ته بریالۍ شوې او د نوي تعليمي کال پيلېدو سره سم نن ښوونځي ته نه وې تللې.
د دې نجونو پلار نورمحمد کوبهانیوز ته وويل: “زما لوڼو حتا د شپږم ټولګي د وروستۍ ازموینې پر مهال ويل، کاش ناکامې شو ځکه د اووم ټولګیو ښوونځي خو تړلي دي.”
هغه وايي،کورنۍ یې خواشینې ده چې لوڼې به يې نور زدهکړو ته دوام نه شي ورکولی.
څه باندې ۹ سوه ورځې کېږي چې، د طالبانو حکومت په افغانستان کې له شپږم ټولګي د پورته نجونو پر زده کړو بندیز لګولی دی.
مخکیني ولسمشر محمد اشرف غني د نوي کال په مناسبت یوه غږیزه پيغام کې له زدکړو د نجونو محرومیت ځوروونکی او بربادوونکی بللی دی.
غني په دې پيغام کې ويلي:”په افغانستان کې نجونې د قران له حکم او پیغمبر ص د لارښوونو خلاف، له زده کړو محرومې دي”
په ورته مهال، پخواني ولسمشر حامد کرزي له افغان زلميانو او پېغلو غوښتي چې, پوهې او لوړو زده کړو ته د لاس رسي لپاره له هيڅ راز هڅو لاس وانخلي. کرزي د نوي کال په مناسبت په خپاره کړي پيغام کې ويلي, تمه لري چې هيوادوال له نوي کال څخه په الهام، هغه پرمختګ ته چې دوی يې وړ دي ورسيږي.
د سولې عالي شورا پخواني رییس ډاکټر عبدالله عبدالله هیله ښودلې چې په نوي کال کې د نجونو پر مخ د ښوونځیو او پوهنتونونو دروازې پرانستل شي او د هېواد باعزته مېرمنو ته، چې زموږ د ټولنې نیمايي برخه جوړوي، د کار زمینه برابره شي.
په هېواد کې د طالبانو له بیا ځل واک ته رسېدو سره سم، له شپږم ټولګي پورته نجونو ښوونځي تړل شوي. که څه هم طالب چارواکي بیا بیا وايي چې د نجونو د زدهکړو پر تګلاره کار کوي، خو دا درېيم کال دی چې تراوسه دا تګلاره نه ده نهايي شوې.