کابل (کوبهانیوز) – طالبان وايي چې په بدخشان ولایت کې د کوکنارو د کروندو پر سر رامنځته شوی ستونزه هواره شوې او د دوی پلاوی له ځايي خلکو سره هوکړې ته رسېدلی دی.
د طالبانو د حکومت ویاند، ذبیح الله مجاهد په یو لړ ټویټونو کې لیکلي چې له کابل څخه استول شوي پلاوي د سه شنبې په ورځ د بدخشان ولایت په مرکز، فیض اباد کې د درایم او ارګو ولسوالیو له استازو سره وکتل او د کوکنارو د کروندو پر سر د رامنځته شویو ستونزو په اړه یې خبرې وکړې.
د طالبانو د حکومت ویاند لیکلي چې د سیمې خلکو د دوی له پلاوي سره ژمنه کړې چې د کوکنارو د کروندو د له منځه وړلو له پروسې به ملاتړ کوي او مخنیوی به یې نه کوي.
د طالبانو حکومت له خلکو سره ژمنه کړې چې څو ورځې وړاندې په لاریونونو کې زیانمنو شویو کسانو ته به رسیدنه کوی، خو د طالبانو د حکومت ویاند دا ونه ویل چې له هغو کسانو سره به څه وکړي چې پر مظاهره کوونکو یې ډزې کړي او یو ځوان یې وژلی دی.
د طالبانو د حکومت ویاند ادعا کړی چې د بدخشان خلک د دوی د کوکنارو د اړولو د پلان ملاتړ کوي، خو د دې ژمنې په بدل کې یې کروندګرو ته د اقتصادي مرستو او د کوکنارو د بدیل کښت یادونه نه ده کړی.
د بدخشان ولایت د ارګو او درایم ولسوالیو اوسېدونکو د جمعې په ورځ وروسته له هغې مظاهرې وکړې چې د طالبانو د سیمه ییز حکومت له خوا په یادو ولسوالیو کې د کوکنارو د کروندو د له منځه وړلو عملیات پیل شول.
د لاريون پر مهال وسله والو طالبانو پر لاريون کوونکو ډزې وکړې، چې له امله يې يو ځوان ووژل شو او يو شمېر نور ټپيان شول.
د یکشنبې په ورځ د طالبانو حکومت د دفاع وزارت لویی درستیز، قاري فصیح الدین په مشرۍ یو پلاوی بدخشان ته واستول شو چې له ځايي خلکو سره خبرې وکړي.
که څه هم ټاکل شوې وه چې دغه پلاوی درایم او ارګو ولسوالیو ته هم سفر وکړي، خو د نامعلومو دلایلو له امله دغه پلاوی له تېرو دوو ورځو راهیسې د بدخشان ولایت په مرکز فیض اباد کې پاتې شوی او نن د دغو دوو ولسوالیو استازي مرکز ته راغلي وو او له پلاوي سره خبرې وکړې.
د بدخشان کروندګر وايي، له دوو کلونو راهیسې دوی ته د کوکنارو د کښت د مخنیوي په اړه خبر ورکړل شوی، خو د طالبانو حکومت نه دی توانېدلی چې له دوی سره لازمې اقتصادي مرستې وکړي او د کوکنارو بدیل کښت ورکړي.
د ۱۴۰۱ کال د حمل په ۱۶مه د طالبانو مشر د کوکنارو د کښت د بندولو حکم وکړ، خو له ژمنو سره سره نه دوی او نه ملګري ملتونه بزګرانو ته د کوکنارو کښت د بدیل کښت په برابرولو نه دی بریالي شول.