کابل(کوبها نیوز)— د طالبانو حکومت کې روابط پر ضوابطو حاکم شوي او په لوړه کچه ګومارنې د پېژندګلوۍ، روابطو او مکتوبونو پر اساس ترسره کیږي.
د طالبانو په حکومت کې یوې سرچینې د نوم نه ښودلو په شرط کوبها نیوز ته وویل، چې دا مهال د وړتیا په نوم څه نشته او ګورمانې او انفکاک ټول سلیقوي او د روابطو او پېژندګلوۍ پراساس ترسره کیږي.
دغې سرچینې وویل چې، « په حکومت کې د شایسته سالارۍ په نوم څه نشته، وزیران او جګپوړي طالب چارواکي له مامورینو نیولې، تر مدیرانو او حتی رئیسانو پورې کسان د روابطو او عادي مکتوبونو په اساس ګوماري او منفک کوي یې.»
سرچینه وايي، د طالبانو حکومتي ادارو کې د هغو کسانو ګومارنې ته لومړيتوب ورکول کیږي، چې د دوی په خبره «جهاد» کې یې برخه اخستي وي او د جګړې د وخت یو ثبوت له ځانه سره ولري. « زموږ ریاست کې یو کس د دندې لپاره راغلی و، زموږ د دفتر مسوول طالب چارواکي پرته له دې، چې د مسلک، تعلیم کچې او وړتیاوو پوښتنه وکړي له هغه وپوښتل چې ایا جهاد کې دې برخه اخستې که نه؟ ایا دسې سند لرې چې ثابته کړي تا جهاد کړی؟»
د چارو شنونکي وايي چې د طالبانو حکومت کې د روابطو، پېژندګلوۍ او سلیقې په اساس د کسانو ګومارنې او برطرفۍ ددې سبب کیږي، چې دوی ته پاتې شوی اداري سیستم له بنبست سره مخ شي او که راتلونکي کې هر بل نظام راځي هرڅه به له سره جوړوي.
د کابل ښاروالۍ د یوې برخې پخواني مسوول کوبها نیوز ته وویل چې په کابل ښاروالۍ او ناحیو کې دده په شمول پخواني مامورین یوازې د اداري چارو د سمون لپاره ساتل شوي او ډېر وخت په داسې چارو مامور کیږي، چې ددوی د دندو د لایحو خلاف دي. هغه وایي، “په لومړیو کې زموږ خبرو ته غوږ نیول کېده، ځکه زموږ رییس غوښتل په اداري کار بلد شي، خو اوس چې نوي مامورین په کار یوڅه بلد شوي، ماته ډېر وخت د میز پر سر د کاغذونو او فورمو د ټولولو او سمولو دنده را سپاري”.
دغه پخوانی مامور وایي، چې ډېره وړه نیوکه او د نویو امرانو له اوامرو سره نا همغږي د پخوانیو مامورینو د انفکاک سبب ګرځي.
خو د طالبانو ویاند او نورو طالب چارواکو تل په خپلو خبرو کې ټینګار کړی چې دوی ته وړتیاوې لومړیتوب لري او په حکومت کې یې هیڅ ډول سلیقوي ګومارنې لو انفکاک نه دي ترسره شوي.
څه موده وړاندې د طالبانو د بهرنیو چارو وزارت سرپرست امیرخان متقي وویل، چې د دوی حکومت کې د رئیسانو او مدیرانو ترکچې ۹۰ سلنه مامورین د پخواني نظام دي او په نورمال ډول خپل معاشونه ترلاسه کوي.