برلین (کوبها نیوز) – د جرمني د نړیوالې همکارۍ دولتي سازمان (GIZ) یو پخوانی چارواکی هانس هرمن دوبې وايي، طالبان په مساوي شرایطو او له فشار پرته خبرو اترو له لارې بدلون ته چمتو دي او غواړي برلین په کابل کې خپل سفارت بېرته پرانیزي.
تېره اوونۍ دوبې په خپل شخصي لګښت کابل ته سفر وکړ او د طالبانو د کابینې له اتو وزیرانو سره یې په ناستو کې برخه واخسته.
د جرمني د RND د څېړنيزې ډلې رییس او د کړکېچ خبريال کان مري ددوبې له خولې وايي، چې طالبان له جرمني سره اړیکو ته ډېر لېواله دي او د دوی اصلي پيغام دا دی چې افغانستان بېرته په خوندي هېواد بدل شوی.
په داسې حال کې چې د ملګرو ملتونو سازمان او نړیوالې ټولنې له خوا د ښځو په تړاو د طالبانو پر سیاستونو نیوکې کېږي، دوبې وايي چې د خپل سفر پر مهال ورته د طالبانو له خوا څو ځلې ډاډ ورکړل شوی چې ښځو ته درناوی کېږي.
دوبې چې له کابل نه تر راستنېدو وروسته یې د افغانستان د وضعيت په تړاو د جرمني د پارلمان د سوسيال دموکرات گوند غړو ته معلومات ورکول، وویل چې افغانان او په کابل کې واکمن پر جرمني ډېر باور لري.
هغه وايي: “دا د طبیعي زیرمو له پلوه د نړۍ ترټولو بډایه هیواد دی. طالبان موږ ته بلنه راکوي چې د دغو اومو توکو له زېرمو د عادلانه تړونونو په ترڅ کې ګټه پورته کړو. د جرمني له سیاستوالو غواړم چې څومره ژر کیږي هلته په ډیپلوماټیکو او پرمختیایي سیاستونو کې برخه واخلو. موږ نشو کولی هغه چینایانو ته پرېږدو، چې لا دمخه هلته دي.”
له ۲۰۰۹ څخه تر ۲۰۱۰ کال پورې د افغانستان لپاره د جرمني ځانګړی استازی برانډ میوڅلبرګ هم ورته نظر لري. هغه د جرمني د RND څیړنیزې ډلې رییس او د کړکیچ راپور ورکوونکي کان مري ته وویل: “د جرمني پالیسي باید په دې ګټو ولاړه وي چې افغانستان د چینایانو لاس ته ونه لویږي. د جرمني ارزښتونه او ګټې هغه وخت پرځای کیږي چې له طالبانو سره خبرو اترو ته کښېنو”.
میوڅلبرګ هم په کابل کې د جرمني د سفارت د پرانستلو پلوي دی. هغه وایي، “که له ښځو سره د مساوي حقونو په برخه کې د همکارۍ هدف تعقیبوو، باید د هغه ځای له حکومت سره عملي خبرې وکړو. زموږ د انزوا پالیسي د مخالفت په دریځ کې د طالبانو له پاییدو سره مرسته کوي”.
د کان مري په وینا، هانس هرمن دوبې باوري دی چې که نړیواله انزوا دوام وکړي، په افغانستان کې به ستونزې لاډېرې شي او په سلګونو زره بې وزله خلک به د جرمني په ګډون نورو هېوادونو ته خپاره شي.