میرانشاه (کوبها نیوز)— د پاکستان پوځ په شمالي وزیرستان کې د ګلبهادر ډلې او تحریک طالبان پاکستان خلاف د پوځي عملیاتو لپاره تیاری نیسي.
په میرانشاه کې سیمه ییزو سرچینو کوبها نیوز ته وویل چې په میرعلي او دته خېلو کې د حافظ ګل بهادر په مشرۍ طالبانو فعالیت په تېر یوه کال کې ډېر شوی او پوځ ته تر ټولو ډېره مرګ ژوبله دې سیمه کې رسېدلې ده.
سرچینه وایي، د تحریک طالبان پاکستان مختلفو ګروپونو او ‘د شمالي وزیرستان د مجاهدینو شورا’ په تېر ژمي کې شمالي او جنوبي وزیرستان ته پرېمانه وسله لېږدولې ده. دغه وسلې د افغانستان د جمهوري نظام له سقوط وروسته په خوست، پکتیا او پکتیکا ولایتونو کې د افغان طالبانو په لیکو کې جنګېدونکو پاکستاني طالبانو ته د “غنیمت” په بڼه په لاس ورغلې چې ستره برخه یې د خوست د KFC ځواکونو پرمختللې وسلې دي.
سرچینې له نومښودنې پرته کوبها نیوز ته وویل چې د عملیاتو له وېرې ګل بهادر ډلې خپلو جنګیالیو ته سپارښتنه کړې چې د میرعلي او دته خېلو له هوارو سیمو نه غرنیو سیمو ته پر شا شي.
طالبانو ته یوې نږدې سرچینې کوبها نیوز ته وویل چې ټي ټي پي په پاکستان کې خپل ستر بریدونه د افغان طالبانو د فشار له امله کم کړي، خو دې ډلې د فشار د حلقې ماتولو په هدف خپل جنګیالي او مرکزونه په قبایلي سیمو کې ځای پرځای کړي دي.
د پاکستان پوځ تېره اونۍ د شمالي وزیرستان د میرعلي تحصیل د زیړ غر شاوخوا پوستې تخلیه کړې او لامل یې ظاهرا دغو پوستو ته پر اکمالاتي موټرو د پاکستاني طالبانو پرله پسې بریدونه ګڼل کیږي.
د پاکستان پوځ په شمالي وزیرستان کې په یوازې سر د پوځي عملیاتو جوګه نه دی، له همدې امله ددغه هېواد لوی درستیز متحده ایالاتو او سعودي عربستان ته پرله پسې سفرونه وکړل چې په کوردننه یاغي ډلو پر وړاندې عملیاتو کې ددغو دوو هېوادونو مرسته ترلاسه کړي.
د چارو شنونکي وایي، بهرني جنګیالي په ځانګړې توګه القاعده شبکه او د هغې د برصغیر څانګه غواړي د ټي ټي پي د ملاتړ له لارې بېرته شمالي او جنوبي وزیرستان ته ستانه شي، له همدې امله اسلام اباد غواړي واشنګټن په نوي شکل بېرته په سیمه کې ښکیل کړي.
د چارشنبې په ورځ د امریکا متحده ایالاتو د بهرنیو چارو وزارت مرستیال ویاند یوې خبري ناستې ته وویل چې واشنګټن او اسلام اباد پر ډیورنډ کرښه او خیبر پښتونخوا کې د ترهګرۍ خلاف د تخنیکي مرستو او نورو اړوندو مسایلو په تړاو توافق کړی.
ودانت پټیل وویل” موږ نن له پاکستان سره له نویو ګواښونو او په ځانګړې توګه ترهګریزو فعالیتونو او اندېښمنوونکو ډلو په اړه خپله دوه اړخیزه اراده تایید کړه، داسې چې نه یوازې پاکستان بلکې هغه سیمه کې هم د پلیتابه وړ ده چې دواړه پکې عمل کولی شي”. پټیل زیاته کړه چې دواړو هېوادونو د تروریستي ډلو د مخنیوي، د بمي چاودنو پر ضد څیړنو، د پاکستان په لویدیځه پوله ( ډیورنډ کرښه) کې تخنیکي مرستو او نورو مسایلو په اړه هم توافق کړی.
دغه توافق پاکستان ته د امریکا د مرکزي قوماندانۍ یا سینټکام د قوماندان جنرال مایکل ایریک کوریلا د سفر پرمهال شوی.
شمالي وزیرستان کې د پاکستاني پوځ د عملیاتو احتمال داسې مهال دی چې د ۲۰۱۴ کال د ضرب عضب عملیاتو نتیجه کې په سلګونو زره خلک بې ځایه شول، خو له افراطي ډلو د پاکستان د حمایې د سیاستونو له امله د ترهګرۍ څپې ورسره کمې نه شوې.