شرنه ( ۱۸ کب ۱۴۰۲ کوبها نیوز) پکتیکا د هېواد په کچه د هغوو ولایتونو په سر کې راځي چې، د زېږون په مهال پهکې د مور ـ ماشوم د مړینې سلنه لوړه ده. دغلته د ښځینه ډاکترانو نشتوالی او ورسره په نشت حساب روغتیایي اسانتیاوې د دې اصلي علتونه یادیږي.
د پکتیکا اوسیدونکي او مدني فعالان وایي د دغه ولایت د ۲۴ ولسوالیو له ډلې یواځې دوه ولسوالۍ، ارګون او خبرکوټ یوه – یوه ام -ډي ډاکټره لري.
په دغه ولایت کې د روغتیایي خدمتونو محدودیت یوازې د نن نه، بلکه له پخوا راروانه ستونزه ده. یوه مدني فعال چې نه غواړي نوم یې یاد شي، کوبها نیوز ته وویل دوی ته ورکړل شوې روغتیایي اسانتیاوې له لویه سره په نشت حساب دي.
دغه مدني فعال وایي پکتیکا پراخه اراضي لري، خو لارې او سړکونه یې سم نه دي جوړ شوي او تګ -راتګ پرې ګران دی. وایي د لارو خرابوالی په خپل ور د اړتیا پر مهال د درملنې لپاره د ناروعانو د انتقال مخې ته لویه ننګونه ده او ساعتونه وخت اخلي چې ناروغ د ولایت مرکز ته ورسول شۍ.
هغه زیاتوي چې پخپله په مرکز (ښرنه ) کې هم د ښځینه ډاکټرانو دروند کمی دی، خو په ولسوالیو کې بیا دغه ستونزه له بریده وتلې درنه ده او داسې کلینیکونه هم شته چې د هغه په خبره د ښوونځیو عادي فارغان پکې د مجبوربت له مخې د تشې د ډکولولپاره د مسلکي روغتیایی پرسونل کارونه کوي.
د دې ولايت یو بل اوسېدونکی جاوید الرحمن بیا وايي، په لرو پرتو ولسوالیو کې د ښځينه ډاکټرانو د نشتوالي له امله مېرمنې اړ دي چې د ناروغۍ پر مهال د درملنې لپاره نارینه ډاکټرانو ته ورشي.
هغه هيله لري چې، د عامې روغتیا وزارت د دې ولایت مرکزي روغتون او د ولسوالیو کلینکونو ته ښځینه ډاکټرانې ولېږي.
په پکتیکا کې يوه ځايي خبریال کوبهانیوز ته وويل، د پکتیکا په ځايي کلینیکونو کې د ښځينه ډاکټرانو د نشتوالي له امله ډېر کله مېرمنې د زیږون پر مهال ژوند له لاسه ورکوي يا يې ماشوم روغتون ته پر لاره ضايع کېږي.
هغه د نوم د نه ښودلو په شرط وايي، د پکتیکا د ۲۴ ولسواليو له ډلې يوازې ارګون او خیرکوټ ولسوالیو کې یوه یوه ام ډي ډاکټره شته دی.
خو د پکتیکا د عامې روغتیا ریاست بیا وايي: “موږ په مرکز کې دوه متحصصې ډاکټرانې او پنځه نرسانې، په ارګون کې يوه ام ډي ډاکټره او نرسانې او په خیرکوټ کې هم د نرسانو په ګډون يوه ام ډي ډاکټره لرو.”
د یاد ریاست د ډاکټرانو په وینا په پاتې ټولو ولسواليو کې قابلې او نرسانې شته دي.
هغوی پر پخواني حکومت نیوکه کوي چې له امکانانو سره سره يې د دې ولایت عامې روغتیا او د صحي پرسونل ډېروالي ته پاملرنه نهده کړې.
بلخوا د جمهوري حکومت پر مهال، د عامې روغتیا وزارت سلاکار بیا وايي چې د جمهوریت په کلونو کې د پکتیکا روغتون رغول شوی او په ټولو ولسوالیو کې يې کلینکونه ایجاد شوي دي.
ډاکټر بازمحمد شیرزاد د پکتیکا په لرو پرتو ولسوالیو کې د ښځينه ډاکټرانو د نشتوالي مسلې ته په اشارې وايي: “د ولسوالیو په کلینکینو کې د ښځينه ډاکټرانو ګمارنه خپلې ستونزې لري. داسې چې ډیر ځله ښځينه ډاکټرانې امکاناتو ته په کتو هلته نه ورځي او يا يې کورنۍ اجازه نه ورکوي.”
د کوبهانیوز همکار هڅه وکړه چې، د ښرنې د عامې روغتیا په روغتون کې د ښځینه ناروغانو پر ستونزو له هغوی سره خبرې وکړي؛ خو بریالی نهشو.
ځايي اوسېدونکي: د پکتیکا په ۲۲ ولسوالیو کې هیڅ ام ډي ډاکټره نهشته
د پکتیکا ولایت د ۲۴ ولسوالیو له ډلې یوازې دوه ولسوالۍ یوه – یوه ام ډي ډاکټراه لري.
